Jamita Juni 2010

Jamita tu Minggu Tgl. 20 JUNI 2010.
EV. Johanes 14 : 1-3.

“UNANG MA BONSA ROHAMUNA, PORSEA MA HAMU DI DEBATA

Di hamuna angka dongan sahaporseaon..!
Didok angka natuatua hata parpudi do sabungan ni hata, ala memang hata parpudi i do somalna na gabe haputusan disadasada panghataion, jala laos hata parpudi i do na gabe sai siingoton. Na tumangkas i molo martona na tuatua di nanaeng jumping ujung ni ngoluna, godang pe angka sipaingot, poda sian ibana tu anakkonna uju dingoluna, alai sai ummarga do hata parpudi di nanaeng borhat i ibana manadingkon angka pomparanna i. Hata parpudi i do na gabe warisan, na ingkon siparrohahonon ni angka anakkon muse, jala sai torus do i di paulak-ulakhon asa sai ingot di tona i. Nian tutu tergantung do i na denggan manang dang hata na pinasahatna i.

Dibagasan turpuk jamitaon di Johanes 14 : 1-3 ima sada pandohan ni Jesus uju martinading hata tu angka siseanNa. Didok “Unang ma bonsa rohamuna! Porsea ma hamu di Debata, jala porsea ma hamu di Ahu!”. Somalna molo didok hata unang ima martudutudu do i tu hata ora-ora, ala boi marpanghorhon hurang denggan di ngoluna manang di tonga ni parsaoran tarlumobi di haporseaonna nasida muse. Alani do didok Unang ma bonsa rohamuna, bahasa indonesia didok do i "Janganlah gelisah hatimu”. Kata ”gelisah” memiliki arti: menjadi cemas, ketakutan, tidak tenang. Artinya kegelisahan ini menunjukkan suasana hati seseorang tidak dapat tenang, kondisi yang membuat seseorang tidak tenteram, tidak dapat istirahat, selalu terganggu dan merasa diganggu. Ragam do sibonsiri ni na mambahen bonsa rohanta, merasa gelisah. Boi do i ala na ingkon marsirang, ditadingkon hita dohot na tahaholongi, boi do i alani parsahiton na manosak ngolunta, boi doi alani faktor ekonomi, faktor kebutuhan. Panghorhon ni na sai lohot di roha na bonsa i, ima sai lalap ma di sitaonon, sai lalap di keraguraguan i ngoluna, sai holan na holso ni rohana i ma na mandondoni ngoluna gabe mago ma hiras ni roha dohot panghaporseaonna di panarihonon ni Tuhan i dibagasan ngoluna. Asa molo dung sisongon i di ngolu ni jolmai disi ma na gabe pesimis, apatis ngoluna, mandele ma ala dang adong be pangkirimonna di Tuhan i. Alani Tuhan Jesus mandok :” Unang ma bonsa rohamuna, porsea ma hamu di Debata”. Dalan laho paluahon dirinta sian bahaya ni ngolu na sai lalap di sai bonsa, holso, gelisah Tuhan Jesus mangalehon solusi tu hita ima: “Porsea ma hamu di Debata”.

Aha do haporseaon?. Didok di Heber 11: 1 “Alai anggo haporseaon i, pos ni roha do i di angka sihirimon, jala pamotoan na tontu taringot tu na so niida”. Porsea ima na martududtudu doi tu hasatiaon, tu habengeton ni roha, tu hatotogu ni panghirimon. Lapatanna tung manang songon dia pe namasa, tung manang songon dia pe kondisi na boi adopan ni hita jolma alai anggo halak na porseai tongtong doi marsihohot di Tuhan i bahkan sahat tu ujung ni ngoluna. Dang mura-mura i mubauba alai tongtong marsihohot. Molo halak na porsea di Tuhan i ndang mura i mubauba, dang mura i menggolenggol songon arung na di ullushon alogo. Lapatanna dang holan di hata sambing mandok : Ahu porsea di Debata Ama, Anak dohot Tondi Porbadia.

Di kenyataan ni ngolu on tung godang do jumpang pangalaho na holan di hata sambing didok, alai holan jumpang angka ujian, tantangan i pintor muba ibana. Hea do adong sada peristiwa na masa di sada barita mardongan poda songon. Sada huta tongon jonok do tu harangan, manang tombak/ hutan. Somal na di luat i sahali saminggu do masa onan. Ala dao do huta on sian jalan besar, laho naik bus, manang motor ingkon mardalan do nasida sian huta i kirakira 3 Km. Disada tingki di masa ni onan borhat ma amanta dohot inantai tu onan. Dung mardalan pat nasida sian hutana, ditingki na mardalan i nasida manghatatai ma nasida, tung manang songon dia ma panghataion ala holan nasida na dua do na mardalan i didok inantai ma di panghataionnasida i. Alai tahe manungkun ma jolo amani si butet nungga songon i leleng na hita marrumah tangga, boha holong do roham dia ahu?. Bah holong do sungkunonmu tu ahu, ninna amanta i, anggo holong ni rohangku tu ho tung tangkas situtu do. Sian ujung rambut sahat tu ujung kaki holong kian do ahu tu ho, sai na i baen do ninna amanta i. boha porlu hu buktihon? Ise na mansusai ho asa hu ambil ibana. Ninna amanta i serius. Daong na manungkun do ninna inanta i. Dung i sahat ma nasida tu jalan besar jala naik motor ma nasida tu onan.

Alai dung dapot tingkina , dung botari, sore, ala disi do parmulak ni angka paronan, mulak ma nasida jala turun ma nasida di dalan ni huta na i. dihunti inantai ma karanjang paronananna mardalana ma nasida. Ala nungga botari nungga mardomu na holom tu na tiur. Di tongan dalan di naso panagamannasida pajumpang ma nasida dohot gompul, beruang sada na ro sian harangan manang hutan i. marnida i, tarsonggot ma inanta i, pingsan ma ibana. Anggo amantai pintor marlojong do ibana tu sada bona ni hau jala laos di jangkit ma hau i. Tading ma inanata i di toru anggo amanta i nungga di ginjang be manatapnatap, anggo inanta on allangon ni gompul ma ibana ninna rohana. Di jonohi gompul ma inantai, sai songon na di anggoanggo ma ulu ni inantai. Alai dang sadia leleng lao ma gompul i muse tu harangan, hutan i. Dang sadia leleng sadar ma inantai, di bereng ma amantai nungga manjangkit di sada hau. Turun ma amanta i didapothon ma inantai, dung di uduti nasida ma mardalan. Alai sai sip ma nasida nadua na mardalan i. Alai huroha sai adong do na sai solot di roha ni amanta i di peristiwa na masa na niadopan nasida nagkining. Di uji amanta i ma manungkun, ai aha do na nidok ni gompul i tu ho, ai sai hira na sai adong do nangkining di husiphon tu ho. Dang adong ninna inantai. Alai dang puas amanta i, dok ma jolo aha do haroha didok tu ho?. Ala sai mulakulak disungkun amanta i didok inantai ma. Imada ama ni si Butet didok gompul do tu ahu: ai dibege do nangkin hatami, ai holong hian do roham di ahu, hape holan hata do holong ni amantami tu ho ninna do tu ahu.
Ai ido tutu holan ro gompul i pintor di tinggalhonho do ahu, anggo hatam holong hian do rohangku. Ninna inantai ma, gabe sai sip ma amantai.
Hamu angka dongan boi masa do i nang di tonga ni ngolunta, tarlumobi nang di panghaporseaonta di Tuhan i sai songon panghatindanghonon ni amanta i, hape holan ro angka na maol ta pingkiri nungga pintor muba panahatindanghononta di Tuhan i. Peristiwa na masa di muara di tingki na salpu sasintongna di sude halak Kristen Batak di tingkion ingkon do gabe sada perenungan i di hita. Marumur ma Hurianta HKBP tu taon 2011 on 150 taon, jala patupaon ni hurianta ma Pesta Jubeleum 150 tahun. Hape ditingki na parpudion marhite persitiwa i nungga mulak haporseaon ni halak Kristen batak tu 150 taon na salpu tagan di hasipelebeguon do pe. Boha do tutu i do gombaran ni haporseaon ni halak Kristen ?. Panghaporseaon na mulak ulak tu pudi?. Porsea do ahu molo di hurianta dang jumpang panghaporseaon sisongon i, alai parhaporseaon na lam tu toras do na mian di hurianta.

Hamu angka dongan
Asa holan marhite manghaporseai Debata i do jawaban di ragam ni na mambahen ngoluntai bonsa rohanta. Alani do molo didok Tuhan Jesus “Porsea ma hamu di Debata, jala porsea ma hamu di Ahu”. On ma na patuduhon hasadaon ni Debata dohot Jesus Kristus. Di Johanes 10 : 30 didok “Sada do Ahu dohot Ama”. Tuhan Yesus ima Anak ni Debata na dilehon bahen tobus ni saluhut hita jolma.
Alani molo satia hita manghaporseai Debata na marlapatan do i na sisada panghaporseaon do hita nang di Tuhan Jesus Kristus. Ai ganup na manghatindangkon Tuhan Yesus di jolo ni jolma i do nang hatindangkonon ni Tuhan i di jolo ni Debata Ama i sogot ( Mateus 10 : 32-33). Asa on ma na parjolo sahali resep ni asa unang sai mian kegelisahan i di ngolunta, asa unang bonsa rohanta di ragam ni angka na boi masa di ngoluntaon ima Porsea ma hamu di Debata, porsea ma di Jesus Kristus. Tuhan Yesus mandok : Dame do hutinggalhon di hamu dame na di Ahu. Asa diragam ni angka na boi masa di ngolu ni angka na porsea di Ibana na sai urupanNa do hita laho manghamonangkon i saluhutna asal ma marsihohot hita manghaporseai Tuhan i. “Haporseaon mi do paluhon ho”. Alani do didok apostel Paulus taringot tu sikap mangadopi ragamni angka na masa di ngolu ni angka na porsea ima: “Marlas ni roha ma hamu mangkirim, marbenget ni roha di haporsuhon jugulhon hamu ma tangiang”( Roma 12 : 12).

Hamu angaka dongan nahinaholonngan..!
Na paduahon naeng disuarahon ma tu hita aha do na gabe tujuan ni ngolu ni angka na porsea di Tuhan i. Tuhan Jesus mandok : ”Torop do inganan di bagas ni Damang. Aut so i, dohononku ma tu hamu: Na laho do Ahu mangarade inganan di hamu?. Jala laho pe Ahu mangarade inganan di hamu, sai mulak do Ahu mangalap hamu, asa rap hamu dohot Ahu!” (ayat 2-3). Molo di bahasa indonesia didok : ”Di rumah Bapa-Ku ada banyak tempat tinggal”. Sada sian kebutuhan ni hita hajolmaon do inganan, bagas, jabu, tempat tinggal. Ala memang tempat tinggal, bagas ima na gabe ingananta berlindung sian udan, las ni ari, bagas ima ingananta mangalap gogo, inganan parsaoranta dohot keluarga tarlumobi dohot Debata. Songon keluarga halak kristen hita, ai sai di pangke ma bagasna gabe inganan partangiangan. Asa sian i naeng dohononna do tu hita molo so jumpang be dibagas , dijabu ni halak kristen dang hea gabe inganan partangiangan nungga ringkot ibana marrujiruji di haporseaonna atik so tingkos be hakristenonna nuaeng. Asa molo taida di partingkian na parpudion godang do halak na agoan tempat tinggal, baik alani bencana alam, alani banjir, alani kebakaran, alani penggusuran songon na masa di angka kota kota nuaeng. Bahkan dang holan i na boi taida na masa, dang holan jolma na mangolu na di gusur tempat tinggalna bahkan angka kuburan, inganan ni angka na mate pe tong do terimbas kena gusur. Alani do adong pandohan semasih hidup di gusur matipun di gusur.

Dang adong hape hasonangan, dang adong hape huta na hot di tanoon. Songon na nidok ni Heber 13:14 Ai ndang adong di hita dison huta na hot; alai dilului rohanta do na ro sogot. Asa didia do inganan na hot na gabe inganan si hirimon ni jolmai, marhite turpuk on ma na gabe mangalehon alus, menjawab pergumulan ni jolma i di partingkian nuaeng na tu masa depanna, paboa Jesus parade inganan na hot di hita di surgo hasonangan i. Sian i botoonta ma ternyata adong do tujuan ni Tuhan Jesus umbahen na ingkon borhat manadingkon angka sisean i, lapatanna dang holan tu kepentingan pribadi ni Jesus alai demi kepentingan ni ganup jolma angka na porsea di Tuhani do ima mangarade inganan. Mansai arga do misi ni haborhaton ni Jesus hape ima mangarde inganan di hita. Patar do marhite peristiwa paskah, di hamamate, haheheon dohot di hananaekNa tu banua ginjang ima na laho mangarde inganan do di angka na porseai. Alai na sai mulak do Ibana muse mangalap angka na porsea i, asa rap hita dohot Ibana muse di inganan na pinaradeNa.

Dipatuduhon i do tu hita paboa tujuan ni ngolu ni angka na porsea di Tuhan Jesus ndada portibion, alai inganan na pinarade ni Tuhan i do. Ia ngolu na di portibion hape ngolu na parsatongkinan do, holan tempat, inganan sementara do hape portibion alai anggo huta na hot na ro di saleleng ni lelengna i ima di inganan na pinarade ni Debata i do.
Asa laos gabe sada apul apul do nang turpuk on tu hita dalan laho patoguhon panghaporseaon dohot hasatiaonta di Tuhan paboa ganup angka na porsea di Tuhan Jesus nungga di parade inganan na pinauli ni Debata sandiri na hot ro di saleleng ni lelengna. Heber 11:10: “ Ai dipaimaima do huta na marojahan na hot, na pinandean jala na pinauli ni Debata”.

Tauji ma jolo mangendehon ende no 522: 1+3 Surgo i sambulonta do i, ndang adong be siaeon disi,Na mamuji tongtong na disi, pinaluani Tuhanta i.Surgo i, surgo I, ndang adong be siaeon disi, surgo i, surgo i, surgo i,Ndang adong be siaeon disi.
Na mangkirim rohangku dison, paima sahat tusi nang au on.Taiti au, ale Tuhan tusi, asa rap dohot Ho au disi.Surgo i, surgo i……..

Antong : Unang ma bonsa rohanta, alai lam marsihohot ma hita manghaporseai Tuhan Jesus Kristus Sipalua i.

Amen.
Gr. Hotman Aritonang