Acara Minggu

ACARA KHUSUS

PARNINGOTAN DI ANGKA NA MONDING

HKBP... NOP ----

Hamu angka dongan saluhutna.

Hombar tu kalender Parhuriaon, sadarion masuk ma hita tu Minggu Ujung Taon Parhuriaon (Minggu Parningotan di angka na monding). Alani minggu na ro on 4 minggu berturut-turut masuk ma hita tu Minggu Adventus, ima minggu pangaradeon manjangkon haroro ni Tuhan Jesus Sipalua i.

Di minggu on bahenonta ma Acara parningotan tu angka naung monding sian tongatonganta, ima angka naung jumolo borhat mandapothon inganan hasonangan i. Sian tongatonga ni keluarganta, sisolhotta manang alealenta tontu nungga adong naung parjolo borhat sian hita. Siala ni i taboto ma naung marsirang hita sian nasida. Ai ndang adong be pardomuan ni tondi ni angka naung mate dohot na mangolu, so holan dibagasan Kristus. Ai nungga ditaluhon Jesus Kristus hamatean i jala nungga hehe Ibana diari patoluhon. Alani i ia mangolu pe hita mangolu di Tuhan i do, jala mate pe hita mate di Tuhan i do. On do haporseaonta.

Alani i, di na tapatupa acara parningotan on, so tung gabe mulak rata sude angka pengalaman na paet siala parsirangan dohot angka na tahaolongi i.  Sotung gabe lam pasigat hinalungun hinadangol. So tung gabe marsak hita, gabe sai holsoan, lumoni siala tabotot tangkas saleleng mangolu di hasiangan on ndang be pajumpang hita dohot nasida.

Molo songon i dia ma nuaeng tonahonon ni acara parningotan on tu ganup hita?.

1. Naeng tongtong uhir tu rohanta paboa nasa jolma do ingkon mate. Ndang manontong hita dihasiangan on. Adong do tingki na tontu sadihari ro joujou ni Tuhanta tu ganup hita.
2. Di Banua ginjang do sambulo ni tondinta, ndang di portibion. Manang beha pe hinauli dohot hajengkaron ni hasiangan on, salpu doi sude rap dohot angka na pinarhagiot ni rohana.
3. Naeng togu tongtong haporseaonta manghirim tu hasonangan naung pinarade ni Tuhan i. Disi ma hita sogot pajumpang dibagasan las ni roha dohot ngolu na imbaru dohot angka dongan naung jumolo i.
4. Antong, saleleng diloas Debata dope hita mangingani tano on, taboto ma asi ni roha ni Debata do i di hita. Naeng dibagasan gogo dohot las ni roha hita mangula ulaonta hombar tu lomo ni Tuhan i.

Nuaeng jahaonta ma goar ni angka donganta naung monding sataon parhuriaon --------on.

Goar ni ruas ni Huria na monding dibagasan sataon parhuriaon

No	Goar-marga na monding	Monding diari/ tanggal	Tutup umur	Alamat	sektor	keterangan

Pungu ma ruas ni hurianta na monding dibagasan sataon parhuriaon:

Ama                            : -----halak

Ina                               :------halak

Naposo Baoa               : -----halak

Naposos Boru             :------halak

Dakdanak Baoa          :------halak

Dakdanak Boru           :------halak +

Pungu ma                    :------halak

Antong---tapahohom ma....tapasonang ma rohanta... ganup ma hita martangiang dibagasan rohanta be.... Laos sude hita jongjong diingananta be (segera hanya organ mulai dimainkan lembut BE.No. 347 (satu ayat saja) kemudian dilanjutkan oleh pengkhotbah dengan meminpin BE NO. 347: 1-3.. dinyanyikan bersama semua anggota jemaat.

Martangiang ma hit: (torus dope jongjong).. Ale Tuhan Debata, na sian nahinan jala na mangolu ro di saleleng ni lelengna ! Huingot hami sadari on angka na mate sian hami, naung pajolohon tu lambungMu. Di Ho do anakhinsu ni banua ginjang, jala diungkap Ho do i di angka na mangasahon Tuhan Jesus Kristus. Na rungka do rohanami sadari on marningot ajalnami, dohot haheheon ni daging di ari sogot. Mauliate ma rohanami tu Ho, ala ditubuhon Ho hami tu pangkirimon na mangolu, gabe partohap hami di hangoluan na so ra suda. Ndada na mandele hami di ari parningotan on, alai na malungun do hami di sambulo ni tondinami. Nunga torop dongannami naung nialapMu; tau sipaingot do ujung ni langkanasida di hami, bahen pangkirimon mida Tuhan Jesus di ujung ni langkanami be. Sai sungguli ma rohanami mambahen tiruan na denggan di angka pinomparnami. Sai apuli ma na marsak roha dohot angka na matean, asa unang mangandungi jala mandele nasida. Sai taiti ma rohanasida mamereng dompak ginjang. Sai lehon TondiM tu hami asa tangkas dihatindangkon tu hami, naung dohot do hami anakMu jala panean di arta na di banua ginjang. Sai padao ma ganggu ni roha sian hami, asa hot haporseaonnami maniop Tuhan Jesus Sipangolu i, andorang hubolus hami rura linggoman ni hamatean i. Molo homur matanami be, ungkap ma mata ni rohanami asa tangkas niida dalan tu hasonangan i. Molo hallang dilanami, so binoto be mangkuling, pargogoi ma hami marhitehite TondiM i, asa tarjouhon hami: Ale Amang ! Sahat tu tanganMu ma tondingku ! Sai patiur hian rohanami, asa hobas langkanami jala sonang hami laho mate di bagasan Tuhan Jesus Kristus, Tuhannami. Amen.(Hundul)

(Dung sidung on, langsung ma dohonon: Hata ni Debata na gabe apulapul jala sipatogu haporseaon nang panghirimon tu hangoluan sogot i ima sian …….(Pangungkapon 20: 11-15).. torus ma masuk tu hatorangan ni jamita.

Barita Mardongan Poda

Susu

Sude do hea mambege hata “susu”. Susu dancow, susu bendera, susu horbo dohot angka na asing. Alai nang pe naung jotjot tabage pandohan i, boi do manghorhon mara pandohan i.

Di sada huria, songon i ma keadaan ni huria i ala metmet do jabu huria i, alani dipangke ma bilut parhobasan ni huria i gabe paninpanan ni uluan ni huria i. Kebetulan uluan i sahalak bibelvrow na praktek. Ala dibilut parhobasan i do adong teko listrik pangalompaan ni tes jala ala laos bilut parhobasan i ma di baen uluan i gabe kantorna. Alani sai somal do inantaon manimpan susu dancow di ginjang ni lemari di kantor i laho si inumonna. Goarna ma kantor huria, na pasti sai ro do angka sintua tu kantor i manang na marsermon nang na manghatai taringot tu angka siulaon nang angka na masa sitaringotan di angka lingkunganna be.

Disada tingki ro ma sahalak sintua marga “S” tu kantor i mandapothon inanta Bibelvrow uluan ni huria i. Dung manghatahatai nasida, didok amanta i ma: Inang bibel dia hamu jolo susumi asa dohot au minum asa tabo hita!. Ni on amang, inum amang ma, ninna inanata Bibel i!. Hape di na manghatai sintua i dohot Inang Bibel i, ala pamolusan ni halak tu hauma do alaman ni Gareja i, tarbege ni sahalak inanta ma panghataion nasida i. Bah…bah nga sega be hape angka parhalado on ai na dohot do hape sintua i manginum susu ni Bibel i. Dipaboa inantai ma panghataion i tu piga piga halak ina na adong jonok tu pargodungan ni gareja i. umbege i hehe ma angka inantai borhat tu gareja laho manangkup sintua dohot Inanata Bibel i, ai nungga na so tingkos be ulaon nasida, ninna angka inanta i.

Sahat ma nasida jala di dapot ma tutu di si do amanta sintuai dohot inanta Bibel i manghatai di kantor i. Masuk  ma angka inantai didok ma, bah na sai songon i do hape di ulahon hamu di kantor on! di ulahon hamu ulaon na so hasea! Ninna sahalak inantai ma muse. Logang jala tarsonggot ma Inanta Bibel i dohot sintua i. Ai aha na masa inang, boasa dohonon muna songon i, ai aha na hubahen hami na sala di ida hamu ? ninna inanta Bibel i ma tu nasida. Daong, unang parsoada! Didok inanta si B on, di bege na dipangido sintua on asa inumonna susumi, hape laos dilean ho Inang, nda ulaon na so hasea na binahen muna i ?.

Ro ma amanta sintua i, bah nga sala hamu, ai susu na digalason do na hupangido jala na hu  inum ndang susu na asing, ni on buktina na digalason. Ai ala na adong do susu dancow ni Inang Bibel on umbahen na pinangido na sala do i di rohamu?. Gabe maila sandiri ma angka inantai jala minta maaf ma tu Inang bibelvrow i ala sala sangka nasida. Gabe di muruhi nasida ma inanta si B na pasahat imformasi bohong tu nasida.

Hamu angka dongan, di tingki na parpudi on tung mansai mura do barita di pahebaheba halak, na metmet i boi do gabe nab alga situtu jala manghorhon mara situtu di tonga ni angka parsaoranta. Na baru dope masa di Tapanuli holan ala ni issu begu ganjang, godang do halak na mate panghilaana mate haporseaonna, mate holongna, dang adong be mangolu roha holong di bagasan ngolu nasida nang pe halak Kristen nasida. Ai pulut situtu do rohana manutung mangolu donganna sahuta, ai pulut situtu do rohana naeng pamatehon sada keluarga nda naung sibolison do jolmai di si ?. Hata ni Tuhanta mandok ndang jadi dohonon hata na so tutu maralohon dongan jolma, ingkon uhum na denggan i do sipaboaboahon, ndang jadi si uhmon dongan jolma molo so tangkas dope binoto sala. Alani manat hita umbege angka barita. I Petrus 3: 10 “Ai "na holong roha di hosana jala na giot marnida ari na sonang, dipasohot ma dilana sian na roa, nang bibirna, asa unang dihatahon ansiansi." Jakobus 3:6 Api do nang dila i, portibi hageduhon; songon i do pangalaho ni dila di tongatonga ni angka ruas ni dagingta, dipahodar do sandok daging i jala dipagalak do panggulmiton ni ngolunta i, dung galak dibahen na roko.

(cerita Ini hanya fiktif belaka)

Barita mardongan Poda

Ulahon ma na denggan sahat tu ujungna

Na tarbarita do parsitutuon ni sahalak pande hau mangorga hau, alani tung mansai las do roha ni sada perusahaan manjalo ibana gabe  pegawai di perusahaan hau naung tarbarita ditingki i. panghorhon ni parbinotoanna i gabe sai lam tu majuna do perusahaan ingananna karejo i.

Alai di sada tingki dung lam matua amanta i, di sangkapi ibana ma naeng pensiun,maradi sian ulaon pande hau i sian perusahaan i. umbege i, didok pimpinan perusahahan i ma tu ibana, andorang so pensiun ho pajongjong ma sada bagas ( Rumah tinggal) marhite sian nasa hamaloonmu jala marhite sian angka bahan na pinarade ni perusahaan. Manang aha di pangido ho na ingkon oloan ni perusahaan ma i asa boi tulus jongjong jabu i.

Sian nasa habisuhon ni amanta i di patupa ibana ma laho pajongjonghon jabu na sinangkapan ni pimpinan ni perusahaan i. Asa unang rugi perusahaan i, jala on nama ulaonku parpudi tumagon ma hubahen bisukbisukhu ninna roha ni amanta i. Alani di sakapi ibana ma jabu i sian angka  bahan na so denggan asa mangomo godang perusahaan i ninna rohana.

Dapot ma tingkina jongjong ma jabu i, pola torop halak mamuji bentuk ni jabu i ala ni ulina. Di patupa  ma sada acara serah terima sian tukang tu perusahaan. Di pasahat tukang i ma, ima amanta i na gabe pandena na pajongjong jabu i tu pimpinan ni perusahaan i. Dungi di na so panagaman ni amanta i didok pimpinan ni perusahaan i ma tu amanta i, on ma kunci ni jabu, bagas na pinasahat ni perusahaanon tu ho amang ala ni saluhut angka jasa naung pinatupam pamajuhon perusahaanon. On pe hu pasahat ma kunci ni jabuon tu ho amang. On ma sumbangan sian perusahaan tu ho ninna pimpinan perusahaan i tu amanta pande hau i.

Gabe amanta pande hau i ma tutu nampunahon jabu na pinajongjongna i. Torop do halak mamuji amantai siala parbinotoanna jala siala pambahenan ni perusahaan i tu ibana. Alai dung pensiun amanta i jala dung diingani ibana jabu na pinajongjongna i, dang hea marhasonangan roha dohot tondina. Boasa?. Ala memang jabu na pinajongjongna i holan sian duru sambing do i idaon uli, hape anggo angka parhauna holan asal adong do. Ai tangkas do di boto ibana ketahanan ni jabu i alani bahan na asal na adong na binahen ibana tu si. Holan di pasahat tu ibana jabu i na gabe sibasabasa ni perusahaan i tu ibana, mulai sian i sai holan na panolsolion  ma dibagasan rohana. Aut hu boto hian ma na tu ahu do pasahaton ni perusahaanon boasa ma ndang hau na tarpillit hubaen, boasa ma ndang parhau na denggan hubaen!. Hape hau sembarangan, na so sadia leleng do ketahananna hu baen. Sai songon i ma panolsolion di roha ni amanta i sahat tu ujung ni ngoluna.

Hamu angka dongan, didok hata ni Tuhanta do tu hita ia i di sabur halak i do tapuonna. Alani binsan dilean Debata dope di hita tingki parasian sahat tu sadarion, unang ma marnaloja hita patupahon na denggan tu saluhut halak. Ai sian parulaon ni jolma i do jaloonna upa na sahat tu ibana, na denggan manang na roa. Asa unang tarhirim ngolunta tumangon ma angka na denggan i pinatupa. Amen.

Barita mardongan Poda

UPA NA MARBAGI DUA

Disada harajaon, tung marasing situtu do hasoloman ni rajana. Ingkon adong do ikan/ dengke asa boi ibana mangan. Disada partingkian manang alani sahit ni dengke namasa gabe suda ma angka dengke di luat i, Mardomu ala ni ombak laut na gogo, panghorhonna dang adong be angka nelayan mardengke tu laut. Alani namasa, hinorhon ni partingkian i di angka pasar manang onan ndang adong be jumpang tutu di luat i dengke. Marsak ma raja i jala ndang mangan be ibana, nungga pola masa songon i saminggu lelengna. Sai marusaha do pangisi ni istana boha ma asa mangan nian raja i alai ala so adong dengke tung so olo do ibana mangan.

Dipatupa harajaon i ma sada pengumuman tu saluhut na ni harajaonna, paboa nungga saminggu ndang mangan be rajai, alani manang ise na boi mamboan dengke tu rajai ingkon dapotan hadiah ma ibana sian raja i.  Dibege sahalak ama ma barita i, alani holong ni rohana tu raja i gabe asi ma rohana, ai nungga saminggu raja i ndang be mangan,  on pe ingkon laho ma au marlaut ninna rohana. Di tondong ma ombak na balga i, laho ma ibana marlaut, dapot na ma tutu dengke na balga. Sian las ni rohana borhat ma ibana tu istana diboan ma dengke na dapotna i.

Alai dung sahat ibana di jolo ni pintu istana i, disungkun sahalak pengawal istana i ma ibana aha do sangkapna umbahen na ro tu istana, dung i di paboa ibana ma. Alai dang di loas pengawal i ibana masuk, alai molo olo ho marpadan hita sadarion loason do ho mandapothon raja i mamboan na binoan mi ninna pengawal i ma tu ibana. Aha ma padanta ninna amanta i!. Molo dilehon raja i tu ho hadiah i ingkon bagi tonga hita, satonga ma di ho satonga na i ma di ahu, boha pandapotmu!, ninna pengawal i. Nauli,  ima tutu padanta ninna amanta i.

Diloas ma ibana masuk, tung mansai las ma tutu roha ni raja i manjalo jala manganhon dengke na binoan ni amanta i. Dung simpul mangan raja i didok raja i ma , nungga marjanji ahu manang ise na mamboan dengke tuson ingkon lehononku do hadiah tu ibana. Antong aha ma hadiah sipasahatonku tu ho nuaeng amang ninna raja i. Mauliate ma rajanami, hadiah na hupangido sian raja i ima cambuk ma au 30 hali ninna amanta i. Longang ma raja i, ai boasa songon i  pangidoanmu!, ai na denggan do na binahen mi tu ahu ,ninna raja i. Ndaong rajanami ala diloas raja i do ahu manontuhon pangidoanhu, onpe ima na hupangido tu raja i, jala sian rohangku do mangidohon i ninna amanta i.

Dungi disuru raja i ma pengawalna patupahon songon na pinangido ni amanta i, alai andorang so dicambuk amanta i, dihusiphon raja i ma tu pengawal i asa nangetnanget amanta i dicambuk. Sahali, dua hali tolu hali sahat ma tu na pasampululimahon dicambuk , marsoarama amanta i. so jolo rajanami..!, ala marjanji do au dohot pengawal ni rajai na di pintu gerbang i, paboa molo adong hadiah na hujalo sian raja i ingkon bagi tonga do hami, i pe ala nungga satonga di au hadiah i, on pe hu pasahat ma i tu ibana satonga na i ninna amanta i.

Tarsongot ma raja i, jala dibagasan rimas, di jou ma pengawal na di pintu gerbang masuk i. Di cambuk ma ibana saparmatena, Ai di cambuk ma ibana sampululima hali nari jala didok raja i ma ingkon sian nasa gogo ni pengawal i ma di baen mancabuk ibana. Gabe gok bugang ma pamatang na. ima tutu upana.

Hamu angka dongan,  on do laba ni halak na mangulahon sipaotooto tu donganna, naeng mambuat paruntungan sian halojaon ni donganna. Torop do nuaeng jumpang pangalaho i di ngolu ni jolma di tingki on ndang mardia imbar idaon. Korupsi kecil sahat tu na korupsi besar-besaran. Ndang mardia imbar na so porsea i manang na targoar halak Kristen pe ibana. Jala tupa masa do i nang di tonga ni punguan ni angka huria. Ingot ma angka dongan, upa tinuhor ni dosa do hamatean (Roma 6: 23), jala ditonahon hata ni Debata do tu hita asa unang ma sarombang hita dohot portibion ( Roma 12 : 2).  Amen.