Minggu, 27 Maret 2011

Renungan

Apakah Yang Anda Cari!!.
Ada banyak alasan mengapa seseorang datang ke gereja
Setiap orang beriman pasti mencari kebutuhan rohaninya dengan mendengarkan firman Tuhan yang menyapanya
Namun ada orang yang hanya mencari popularitas  dengan mempertontonkan apa yang ada padanya, sehingga terkadang ada toko mas berjalan.
Namun ada juga orang hanya oleh karena kumpulan koor, sehingga hanya mencari kelompoknya saja yang di carinya, sehingga ketiak sesuatu pergumulan gereja ada maka kelompoknya ini menjadi suatu kekuatan baginya untuk mensukseskan keinginannya.
Yang lebih parah lagi ada orang datang ke gereja hanya untuk mencari kode alam?????
Suatu refleksi bagi kita saat ini apa yang kita cari sebebenarnya dalam hidup ini.
Syair nyanyian sebuah nyanyian sekolah minggu mengantakan: apa yang di cari orang Uang, apa yang di cari orang pagi petang siang malam uang, uang-uang -uang - uang yang berkuasa!!!
siapa yang di cari Tuhan saya, siapa yang di cari Tuhan pagi petang siang malam, saya, saya-saya-saya orang yangberdosa.
Yesus mengajarkan: carilah dahulu kerajaan Allah dan kebenarannya maka semuanya itu akan ditambahkan kepadamu ( Mat.6:33)
Amin.

Minggu, 20 Maret 2011

Jamita Minggu Reminiscere. 20 03 2011

JAMITA MINGGU REMINISCERE
20 Maret 2011
“Janghon ma Jesus di ngolum”
Mateus 12: 38 - 42

Hamu angka dongan sahaporseaon dibagasan goar ni Tuhanta Jesus Kristus.
Disada barita masa, jumpang do parsualon di sada keluarga, amantai dohot inanta i. panghorhon ni parsualon i sahat do na so marsiantoan nasida. Somalna molo laho mangan amanta i sai diparade inantai do, alai dung parsualon i gabe marsibuat sipanganonna be ma nasida. Mansai malo do antong amantai molo ro dongan manang tondong tu jabu nasida martamu, ndang pola dipatuduhon na marsoal nasida, ai sai pintor sigop do amantai mandok tu inantai asa mambahen tes manang kopi jala olo do antong inantai patupahonsa. Idaon ma na so adong angka sipingkiran hape anggo di roha ni inantai nungga marsigorgor ala na di suru amantai ibana. Dohonon ma ima gombaran ni ngolu sipalessem i. Boi do antong jumpang pangalaho i mian manang na piga minggu bahkan mamolus bulan. Di sada tingki marsahit ma inantai, dang binoto manang ala ni na sai tertekan batin, gabe marsahit ma jala sai peak ma di podomanna. Di mulana ala ni prinsip ni amantai dohot inantai, hot do pe ndang marsipangkulingan nasida, hot dope marsibuat sipanganon dohot siinumonna be nasida. Alai lam posa ma sahit ni inantai, alani ro ma ianakkonna sisadasada i dohot parumaen nang pahompuna jala hatiha i laos dibagas nasida muse partangiangan sian huria. Dapat ma tingkina dipatupa ma partangiangon di bagas i manangiangkon parsahiton ni inanata i. Toho jamita ditingki i na mangondolhon marsijangkonan ma hamu songon panjagkonon ni Kristus di hita (Roma 15:7). Idaon songon na ditangihon do jamita i, sai songon na undukunduk do amantai dihundulanna songon i inantai di podomanna. Mulak ma parhalado nang ruas sian bagas nasida. Manghatai ma anakna i, diboto ma hape na so marsipangkulingan do natorasna i . Alani sai di soso i anakna i ma asa mardame nasida, alai nungga piga ari dung ro anaknai sai songon i dope di ida natorasna i. Dungi didok anaknai ma, mulak na ma hami tu ranto ala nungga habis cuti. Dijalang anakna i ma natorasna i songon i nang parumaennai rap dohot pahompuna i. Dung mulak anakna i, hundul ma inantai mangora amantai, ompu ni si ucok!, ai sadia di jalang parumaentai tu ho?. I ma da dijalang do tu au tolu ratus ribu, ia ho sadia di jalang parumaentai ! ninna amanta i. Bah sarupa do, tong do tolu ratus ribu ninna inantai. Dung i didok amanta i ma tuani ma ate, ala na so marsipanghulingan i hita gabe dapotan tolu ratus ribu be hita.

On ma gombaran ni jolma na marsijangkonan, na mardomu alani hepeng ai umarga do hepeng i dirohana. Panghorhonna ima gabe mago ma parsaoran na uli ditonga ni ngolunasida. Boasa masa na songon i?, ima ala mangolu di ngolu na marsipaula nasida. Panghorhon ni na marsipaula ima maol manjanghon hata ni Debata hangoluan i.

Hamu angka dongan!. Halak na marsijangkonan dao do sian ngolu ni i mara ala nungga adong dongan na rade mangurupi nang na mandongani ibana. Molo rap marsijangkonan hita sai taruli pasupasu do ngolunta i, ai boi ma tarula hita angka ulaon i nang pe na borat ulaon i, ala adong dongan na boi rap manuhuk gabe neang ma i, ima panghorhon ni ngolu na marsijangkonan. Asa umbalga sian i dope panghorhon ni haulion manang laba ni ganup halak na rade manjangkon Jesus Kristus di ngoluna. Molo dung di jangkon Jesus ngolunta sonang ma danging nang tondinta. Manjangkon dipatuduhon i do haradeon ni roha parbagasanna manjalo manghaporseai jala mangulahon hata ni Debata sian nasa roha dohot gogona.

Dibagasan turpukon, na mangido tanda do angka Parise dohot siboto surat tu Jesus. Horong Parise dohot sibotosurat on ima angka horong ni angka siradoti patik dohot sibotosurat na mangajarhon taringot tu ruhut ni angka parugamaon ni hajahudion di tingki i. Marhite sian angka panangkasion nasida di patik i gabe adong ma angka ruhut ruhut na gabe uhum parugamaon ni Jahudi. Horong on ma na patupa dialog, diskusi manang panghataion marhite angka sungkun-sungkun nang angka panghataion laho manggasipi sahat tu na mangunjuni Jesus.

Sambolus idaon tung mansai uli do pandohan nasida ai didok do “Guru” mandok Jesus. Pandohan Guru, ima na manggombarhon paboa sahalak na sangap do Jesus dirohanasida, hape sasintongna holan lemus, holan sipalessem sambing do i. Ai holan dipanghataion sambing do songon na sangap Jesus i di bahen, alai anggo di roha parbagasanna tu asing situtu do, ai gok habusuhon dohot sangkap na roa do na adong di rohanasida taringot tu Jesus.

Manat hita di angka pangalaho i, molo didok: “risi risi hata ni jolma lamot lamot hata ni begu”. Sotung do naung parsidohot angka na targoar Kristen manang parhalado pe na mangolu di pangalaho i. Targoar do ibana halak Kristen, ro do tu parpunguan ni halak Kristen hape holan na manggasipi do ulaonna. Idaon songon na parsidohot do di angka ulaon ni huria rupani, hape asing do anggo sangkapna anggo diroha parbagasan, ai dang na tutu sian haporseaonna di Tuhan i ibana patupahon angka sipatupaon di huria i. Asa tardok sada panangkasion manang evaluasi ma i di ngolunta ditingkion.

Hamu angka dongan.
Didok na mangido tanda do Parise dohot siboto surat i tu Jesus. Tanda na pinangidona disi ima sada halongangan balga dohot sangkap manang tujuan asa gabe porsea ma nasida di Tuhan Jesus. Hape sasintongna nungga godang di ida ni bangso i angka tanda naung dipatupa Tuhan Jesus paboa na Anak ni Debata Ibana. Ai dipamalum do angka na marsahit, marnida angka na mapitung, mardalan angka na pangpang, ias angka na huliton, mulak mangolu na mate (Lukas 7:22), aek gabe anggur ( Johanes 2). Nda tanda halongangan angka na balga i?, hape mangido tanda dope nasida.

Molo tasigati Bibelta i, boi do tubu sungkun sungkun dirohanta boasa di Padan na robi, ia si Gideon mangido tanda tu Debata hape di lean Debata do tu ibana tanda? (Panguhum 6: 17, 36 – 40). Hape dison boasa dang di olo i Tuhan Jesus pangidoan ni Parise dohot sibotosurat i?. Sian i botoonta ma paboa ndang tu sude na mangido tanda tu Tuhan i di olo i Debata. Ia Debata si ida roha parbagasan do Ibana, di boto Ibana do aha na buni di roha ni jolma i. Ai marasing do roha ni si Gideon dohot angka horong ni Parise nang sibotosurat i nang pe na rap mangido tanda nasida. Molo si Gideon sian roha na manghaporseai Debata do ibana mangido tanda dipandonganion ni Debata diparaloon ni bangso i maradophon halak Midian. Dalan laho patoguhon, paposhon rohana do dipanghaporseaonna di Debata. Hape ia Parise dohot sibotosurat i, ai ala na so porsea do nasida, dang na nionjar ni haporseaon nasida mangido tanda, ai na naeng mangunjuni Jesus Kristus do sangkap nasida. Taringot tu na mangido tanda, nang si bolis i pe dipangido do Tuhan Jesus asa patupahon tanda halongan uju na ni ujunanna Tuhan Jesus. Sada alus ni Tuhan Jesus di si ima “ndang jadi unjunanmu Jahowa Debatam” (Mateus 4: 1-7). Marhite sian i naeng dohononna do, paboa ndada di tanda halongangan i anggo unok ni Harajaon ni Debata, alai dipanjangkonon jala panghangoluhon di hata ni Debata na sahat tu ibana i do (Roma 10: 17). Asa unang gabe panghaporseaon na longang sambing jolmai (Lukas 16: 30 – 31).

Molo taida di tingki na parpudion, torop do halak naeng mangalului jala marnida angka tanda halongangan dungi didok ipe asa gabe porsea ibana di Tuhan i. Nungga torop halak parhaporseaon na longang, ala di ida angka tanda halongangan na pinatupa ni angka parsibalik mata, gabe longang rohana jala masuk ma ibana tu horong ni i. Panghorhonna, ditadinghon ma haporseaonna, diparsoada ma pandidion na badia naung sahat tu ibana, ganti merek produk ma ibana jala ndang holan i tupa gabe ditihai ma huria haborhatanna hian. Alai na umarga naeng idaonta sian namasa i ima, pangalaho ni jolma i do na marparsoadahon hinaarga ni panghohopon ni Tuhan i di ngoluna ala na pinarsoadanai pandidion na sahat tu ibana. Sasintongna molo ta pamanat hata ni Tuhan i, angka pangalaho i nungga tibu hian i di paingothon Tuhan Jesus tu angka siseanNa, taringot tusi didok do: “Ai na hehe do sogot angka Kristus pargapgap dohot angka panurirang pargapgap, patupahon tanda na balga dohot halongangan, laho mangaliluhon nang angka na pinillit “ (Mateus 24:24). Alani naeng manat hita sotung tartait ngolunta dohot haporseaonta tu angka pangalaho i.

Hamu angka dongan !. Didok Tuhan Jesus na mangido tanda do bangso na jahat jala na mangalangkup on (ayat 39 – 40). Hata mangalangkup ima na patuduhon paboa horong na so satia do nasida. Pangalangkup di haporseaon ima na marduahon Debata di ngoluna. Didok porsea tu Debata hape di somba muse debata ganaganaan (2 Musa 20:3). Marhite hatana dipuji Debata hape ia parulaonna ndang hombar tu lomo ni roha ni Debata, ai siula hageduhon na gok sipaula do ngoluna (Lukas 20:20). Boi dohonon nasida ma parhaporseaon sipalessem. Ima ngolu na marsipaula, ai ndang hombar hatana tu parulaoonna (Kemunafikan, lain di bibir lain di hati).

I do umbahen didok; “ alai ndang lehonon tanda tu nasida, ia so holan tanda na masa tu panurirang si Jonas”. Taringot tu tanda halonganan na masa tu si Jonas nungga tibu di boto bangso Israel (Jona 2: 1- 2). Halongangan do na masa tu ngolu ni si Jonas i, tolu ari tolu borngin di butuha ni ihan raja i. Sasintongna pengalaman ni si Jonas do i, ndang di ida pangisi ni huta Ninive tanda halongan na masa dingolu ni Jonas i. Nian, tanda halongan na masa tu si Jonas i do muse na mangonjar ibana borhat mamaritahon hata ni Debata tu pangisi ni huta Ninive na jahat i. Antong aha do na mambahen pangisi ni huta Ninive malua sian rimas ni Debata?. Haluaon nasida ima diharadeon ni roha ni pangisi ni huta Ninive i do manjalo jala manghaporseai pamaritaon ni si Jonas di hata ni Debata. Asa na ummarga sian i ima paboa ndada alani tanda halongangan i umbahen malua pangisi ni huta Ninive sian rimas ni Debata, alai na manjanghon jala manghaporseai hata ni Debata i do huhut dipatuduhon ma i marhite ngolu na marhamubaon. On do tua ni pangisi ni huta Ninive. Tuhan Jesus mandok : Martua ma na porsea atik pe so di ida ( Johanes 20: 21), Martua ma na umbege hata ni Debata jala na umpeopsa (Lukas 11: 28). Martua ma tutu pangisi ni huta Ninive i ala ditangihon nasida hata ni Debata na pinatolhas ni si Jonas tu nasida, taruli asi ni roha ni Debata ma nasida, ai ndang madabu tu rimas ni Debata be nasida. Asa ngolu na umbege, manghaporseai jala mangulahon hata Debata i do hataridaan ni halak na manjangkon Debata dingoluna. Panjanghonon di hata ni Debata i marhataridaan do i gabe suman tu Kristus i ma ngoluna (bnd. Johanes 13: 33).

Hamu angka dongan.
Asa molo pe tanda halongangan na balga do na pinatupa ni Debata tu ngolu ni si Jonas tolu ari tolu borngin di butuha ni dengke na bolon i manang ihan raja i, alai naeng do idaonta tanda halongangan na umbalga sian i do muse na pinamasa ni Debata marhite Jesus Kristus dibagasan hamamate dohot haheheonNa. Di na mulak mangolu Jesus Kristus di ari patoluhon, nungga ditaluhon sorop ni dosa dohot hamatean i. Ndang hamatean i be na gabe ujung ni ngolu ni angka naporse i alai mangkirim di hangoluan sogot na pinarade ni Debata di angka na porsea di Ibana. Asa on do Asi ni Roha ni Debata tu hita, on do na gabe impola ni haporseanta di Tuhan i (1 Korintus 15). Ai gabe panean hita di hangoluan na so ra suda i. Asa marhite haheheon ni Tuhan Jesus Kristus dipatuduhon i do panghirimon ni ngolunta tu hangoluan sogot.

Hata sogot martudutudu do i tu tingki na nanaeng ro, ari ni Tuhan i (Parusia) di hamamasa ni paruhuman sogot. Di ari sogot, na jongjong do Kristus manguhumi portibion (1Kor 6:2, Mat 19:28). Di ari sogot i ma jongjong angka na porsea i rap dohot Kristus manguhumi portibion. Jumpang ma pangalaho uhuman moral tu angka na manulak Jesus Kristus naung ro tu tongatonga ni hajolmaon. Jumpang ma pangalaho di si bangso manang horong na dirajumi si uhumon hian (di luar ni Jahudi manang sipelebegu), hape ala di jangkon nasida hata ni Tuhan i gabe taruli asi ni roha ni Debata nasida, gabe sahat tu nasida haluaon i. Jala angka na so ra manjanghon Jesus i di ngoluna, namanulak Jesus, uhuman ni Debata ma jambarna.

Antong, argahon ma tingki parasi ni roha ni Debata na sahat tu ngolum. Janghon ma hata ni Debata di ngolum jala papatarma haporseaonmu marhite parulaonmu alani Tuhan i. Amen.







Usul tu acara Minggu:

1. Marende No. : 565 : 1-3
2. Agenda : 57/ B2- 77/20
3. Marende No. : 20: 2 + 5
4. Patik : I – IV
5. Marende No. : 681 : 1 – 2
6. Manopoti dosa : 70/B 9 – 72/C 9
7. Marende No. : 458: 1 2
8. Epistel : Roma 5: 1- 5
9. Marende No. :443 : 1-2
10. Manghatindanghon Haporseaon
11. Marende No :789 : 1---
12. Jamita : Mateus 12: 38 – 42
13. Marende No : 467 : 1 –
14. Tangiang Pelean- Ale amanami- Pasu-pasu- Amen







Oleh : Hotman Aritonang


Jamita Epistel Minggu Reminiscere
20 Maret 2011
“Debata do mamintori hita”
Roma 5: 1 – 5

Hamu angka dongan
Asi ni roha ni Debata sambing do molo di pintori hita. Asi ni roha i ima silehon-lehon ni Debata na arga tu hita jolma. Molo didok silehonlehon ndada songon silehonlehon na somal na tatandai rupani i. Ai somalna tutu halak marsilehonlehon tu donganna sian halobian ni sinadonganna do dilehon na gabe asiasina tu angka na pogos. Jala jotjot do jumpang pangalaho na so marlapatan di ibana hian be isarani baju manang barang bekas ima na gabe dilehon bahen pangurupionna tu angka na mangharingkothon, manang ala ni na hona bencana alam manang na hagoran. Asa sahalinari ndada sisongon i ango pangalaho ni asi ni roha ni Debata i. Alai umbahen na gabe didok silehonlehon ni Debata pe i tu hita, ala memang mansai arga situtu do i, ai tung sadia pe arta ni jolma ni portibion godangna tung so tartuhor ni i do asi ni roha ni Debata i. Lapatanna tung so tarasam do arga ni asiasi ni Debata i, jala sasintongna ala ni arganna tung so patut do nian hita molo sian hadirionta sambing marnampunahon, manjalo manang gabe panean di asi ni roha ni Debata na arga i. Alai on do di patupa Debata tu hita ala arga do hita di adopan ni Debata, jala alani holong ni roha ni Debata tu hita gabe dibasabasahon Ibana ma i tu hita (Epesus 2:8-9, Johanes 3: 16). Ima asi ni roha ni Debata.

On do pamintorion ni Debata di ngolunta, ai na so patut do hita nian asian ni Debata ala ni dosa ni jolmai, ai ingkon sirimasan ni Debata do nian hita alani dosa i, ingkon hamatean do nian jambar ni jolma i ala ni dosa i ai upa tinuhor ni dosa do hamatean ( Rom 6: 23). Alai ala ni balga ni asi ni roha ni Debata di ngolunta gabe dipintori, dibenarkan, dilayakkan hita (Johanes 3: 16). Asa hape ndada alani parulaonta na naeng sipangasahonta alai tung asi ni roha ni Debata sambing do. I do umbahen na ni dok ni si Martin Luther : “ Sola Gracia”, paboa holan asi ni roha ni Debata sambing do sipangasahononton. Asa marhite pamintorion ni Debata i ma dibagasan asi ni rohaNa i gabe dipaimbaru saluhut ngolu ni angka na porsea i di Ibana. Panghorhon ni pamintorion ni Debata dingolunta, dipapatar i ma tu hita hasintongan ni hajongjonganta songon parnampunaon ni Debata hita. Jala laos ihut tu si ma hapataranna ima naung mardame hita dohot Debata marhitehite Jesus Kristus. Asa holan marhite Jesus Kristus sambing do jumpangan asi ni roha, jumpangan pamintorion, jumpangan hasintongan ni hajonjongan ni ngolu, jumpangan dame ngolunta i (Johanes 14: 6). Holan Ibana do na gabe parhiteanta na sintong tu Debata.

Molo di tradisi ni Padan na robi, asa boi jolmai marsaor dohot Debata na badia i, ndang boi jolma i sian hadirionna langsung manghatai, marsaor dohot Debata. Alani do ringkot parhitean, perantara. Parhitean ni bangso Israel manghatai, marsaor dohot Debata ima marhite na pinillit ni Debata, na pinabangkit ni Debata di tongatonga nasida Malim. Malim i do na gabe parhitean na mewakili bangso Israel ro mandapothon Debata di bagasan habadiaonNa. Alai ipe ingkon jumolo do nang Malim i pasahathon pelean hasesaan ni dosana tu adopan ni Debata, ala jolma pardosa do nang malim i (3 Musa 16), dung pe i boi ma ibana pasahathon pelean ni bangso i.

Hasisingkop ni Hamalimon i jumpang do i dibagasan hadirion ni Tuhan Jesus Kristus. On do hasurungan ni Jesus Kristus na gabe parhiteanta tu Debata, ai Ibana do malim na sintong i (Heber 5:10 ; 9:11). Jesus Kristus do parhitean ni Debata tu hita jolma papatarhon hamuliaonNa, HasangaponNa, Huaso nang HarajaonNa, sangkap dohot lomo ni roha ni Debata. Alai laos huhut do nang Jesus Kristus sandiri do nang na gabe parhitean ni saluhut hajolmaon na dibagasan dosa i asa jumpangan haluaon, i do na pinatupaNa marhite pelean pardengganan sahali tu saleleng ni lelengna dibagasan diriNa sandiri marhite hau pinarsilang i. Alani dosa ni hajolmaon i do umbahen na mate tarpajal Jesus di hau pinarsilang i ima pardameanta tu Debata. Ai marhite mudarna na durus di hau pinarsilang i gabe diburi saluhut dosanta. Marhite diri ni Tuhan Jesus di gohi saluhutna na ni dok ni patik i ( Galatia 4: 4-5)

Asa hamu angka dongan, on do pamintoron ni Debata di hita, marhite Jesus Kristus gabe bongot hita tu asi ni roha ni Debata, manghirim disiteanon sogot sihirimon i marhite haporseaonta. Haporseoan ima silehonlehon ni Debata na arga nang tu hita jolma. Alai anggo haporseaon i, pos ni roha do i di angka sihirimon, jala pamotoan na tontu taringot tu na so niida (Heber 11 1). Haporseaon i tubu sian panangihononta di hata ni Debata do (Rom 10: 17), asa marhite panjanghononta di hata ni Debata do taboto tangkas sihirimon na pinarade ni Debata di angka na porsea di Ibana. Alai nang ngolu ni halak na porsea i, naung pinintoran i pe na ingkon mardalan do nang ibana manuju tu hatotoras ni haporseaon, dang pasif alai ingkon pro aktif. Lapatanna dibagasan ngolu ni na porseai jumpang do di si sada proses ni haporseaon. Proses i ima mangadopi haporsuhon asa tu habengeton ni roha, sian habengeton ni roha gabe marhatauon, sian marhatauon i gabe togu ma tu ngolu pangkirimon.

Molo di dok haporsuhon, ndada na martudutudu tu hapogoson ni ngolu i ala ni ekonomi, alai na martudu tudu do i tu angka parporangan ni haporseaon ala halak Kristen ibana, songon na masa na niadopan ni huria na parjolo i, ala ni haporseoanna di Tuhan Jesus kristus godang do haporsuhon na ni adopan nasida alani haporseaonna di Tuhan i pola do sahat tu na adong agoan hosa ala halak Kristen nasida (Ulaon Apostel 5: 55 - 57). Asa nang pe ro angka haporsuhhon i ndada gabe sumurut angka na porsea di Tuhan i, ndada gabe mandele alai lam togu do nang hiras ni rohana di Tuhan i, di habengethon nasida do i ala tangkas di boto nasida upa sihirimon ni haporseaon i na pinarade ni Tuhan Jesus Kristus di angka na maniop haporseaonna ro di ujungna di Ibana (Pangungkapon 2: 10c). Asa halak na mangolu dibagasan Kristus sai marlas ni roha do i mangkirim, marbenget ni roha di haporsuhon jala jugul di tangiang (Roma 12: 12). Ai tangiang do dalan mangido gogo dohot pangurupion sian Tuhan asa pinargogoan ni Tondi Porbadia i hita mangalehon alus na patut di angka siparungkilhonnta.

Antong halak naung pinintoran ni Debata ima halak naung manjanghon Jesus Kristus dibagasan ngoluna, na marsihohot so mubauba haporseaonna dibagasan asi ni roha ni Debata na sahat di ngoluna. Amen.

Usul tu Acara Partangiangan:
1. Marende No. 754: 1- 2
2. Agenda : 57 /2 – 77/22
3. Marende No. 194 : 1 - 2
4. Turpuk Sijahaon: Mateus 12: 38 - 42
5. Marende No. 826: 1 - 2
6. Jamita : Roma 5 : 1 – 5
7. Marende No. 183: 1 + 3
8. Tangiang Pangondianon :
9. Marende No. 763 : 1 - 2 ( P. Pelean)
10. Tangiang Pelean – Ale Amanami – Pasupasu. Amen