Barita Mardongan Poda

Barita Mardongan Poda

I Timoteus 4:7
“Pasomalsomal ma dirim mangulahon hadaulaton!”

Didok sada poda ni natuatua: Somalna do peamna. Tung mansai bagas do lapatan ni pandohan i, jala marhataridaan ma i di nanaeng marujung ngolu sahalak amanta naung matua na marumur 70 taon. Nungga marsahit sahit ibana jala holan na peak nama ibana di podomanna. Nungga adong 3 bulan sai songon i ma ngoluna di urus angka keluarga. Di dok barita i marpungu ma sude angka keluarga  pashathon  sipanganon na tabo tu amanatai, ninna roha atik na adong do na pinaima ni amantai  sian angka pomparanana umbahen na sai songon i si aeon ni amantai, sai malgipalgip alai dang haru marujung. Di na dipatupa ulaon i, sai songon na hipas ma amnatai boima ibana humosur. Jala sai songon na martopak topak ma ibana alai dang haru ruar anggo soarana. Marnida i las ma roha ni angka pomparanna. Tanda do parhuria hian natuatua on uju hipas ibana ninna. Ai sai di ingot do di itngki na marminggu i marende martopak ibana. Toe marende ma hita aha hian ende halomoan ni amanta ninna sahalak boru ni amanta i ma. Alai sude na pungu i dang mamboto aha ende na. Alai nang pe songon i diuji nasida ma mangendehon sada ende sian buku ende i, ala martopak do amanta berarti ende olopolop do endena i ninna. Diendehon nasida ma buku ende 435: “ Marolopolop tondingki”.

Dung marende  nasida ba sai mangupiri ma simajungjung ni amanta i. marnida i didok anak na na sian pangarantoan i ma dang i huroa na pinagido ninatuatua on.  Antong aha do na pinangidona?, sai disungkun dang haru boi ibana mangalusi, marnida i mangandungi ma sahalak ianakkonna asa dialusi natoras na i nian nasida molo apa tung ima ujung ni ngolu ni natuatua i. alai dang haru boi tarbege soara ni amanta i.

Ala ni andung ni anak na i gabe ro ma angka ama ni huta i sian lapo na adong di huta i. Dung di ida angka amanta i amanta na marsahit i sai martopak topak  gabe marsihusiphusipan ma nasida. Na pasuangsuanghon na ma i ninna sahalak amanta ma, na di ingot i do nuaeng angka ulaon hasomalanna di tingki hipas ibana. Boha hamu angka pomparan ni amanta on nungga tulus rohamu ninna sahalak amanta ma mandok tu pomparan ni amanta na marsahit, didok ibana ma apala aleale ni amanta i. Bahen uda ninna sahalak anakkonna ma, ai dang tarpidaida molo sai songon songon natuatua on ninna.

Didapothon amanta i ma tu podoman ni amanta na marsahit i di buat ma sian sangkuna kartu joker dilean ma tu tangan ni amanta i. Pintor mengkel suping ma amanta  na marsahit i. di kossok ma tutu kartu i. Dipasahat ma tu ibana sat ni jombut, “ hepeng! “ ninna amanta na marsahit ma. Dung dipekahon kartu i, dang sadia leleng tos ma amanta i.
Bah ai dang na ala ni marende hape umbahen na martopaktopak ibana, alai ala ni na markartu i do. Sat ni jombut i ma hape na gabe  hata partadingan di angka pomparana, ninna sahalak amanta ma marnida na masa i.
Taingotma angka dongan somal do peamna.
Hata ni Tuhanta na tarsurat di I Timoteus 4:7 mandok: “Pasomalsomal ma dirim mangulahon hadaulaton!”