Barita mardongan poda

PADAN

Arga do padan di halak batak, marhataridaan do i marhite pandohan : Togu urat ni bulu tu toguan urat ni padang togu nidok ni uhum toguan nindok ni padan. On ma pandohan na patuduhon hinarga ni padan i na dirajumi tumimbo do i sian uhum. Ala uhum boi do i dipahombar tu kepentingan, manang boi do muse hombar tu pribadi ni na padalanhonsa do jotjot na boi jumpang di uhum i. Songon na masa di tingki na parpudi on, alani do adong pandohan KUHP dilapati gabe Kasih Uang Habis Perkara. Lapatanna godang do halak na marparmeamhon uhum i hombar tu ringkotna.  Godang do kasus dipardalanan ni uhum na so tingkos be nuaeng alani pangalaho ni angka MARKUS ima MakelaR KasuS na adong di angka pengadilan ditingkion. Panghorhonna godang do na gabe korban ala dipapeol pardalan ni uhum i. Halak na sintong gabe terdakwa ala gumogo, jala parhepeng si ulahon hajahaton i.

Alai anggo padan na tinanda ni halak batak dang songon i, alai na tumimbo dope panghorhonna sian uhum i. Jala somal na angka na sintong do padan i.

Padan ima hata na mangihoti dua halak manang sada kelompok marga manang huta. Isarana antara sahalak naposo boa tu sahalak na marbaju na marpadan di holong ni rohanasida na ingkon satia sahat tu na marrumatangga muse. Manang songon padan ni sada marga. Alani adong marga na sapadan dohot marga ni na asing. Padan dirajumi do i na sacral, badia na ingkon siradotan jala kedua belah pihak na ingkon manjagahon asa unang di ose padan i. Somalna dipardalan ni padan i sai adong do konsekwensina molo diose padan i. Alani do adong pandohan “Dengke ni sinabulan tu tonggina tu tabona manang ise siose padan turiburna tu magona”. Angka na mangoes padanna sai ingkon manangam do ibana di akibat ni pangalaosion ni padan i.

Adong do sada barita na tarbarita di hita halak Batak. Sahalak dolidoli di sada luat di samosir ulaonna mangula do diladang. Alai sai somal do ibana marbubu dengke asa adong ikan na. disada tingki dung botari di baen ibana ma bubu na i tu sada batang aek na jonok tu jabuna. Dung manogotna i di ida ibana ma naung dapotan sada ihan na balga bubu i. las ma rohana di boan ibana ma dengke i tu jabuna. Alai ninna roha ni dolidoli i tu lading ma jolo ahu tahe, anon ma hulompa dengke on. Alani di baen ibana ma dengke i tu sada inganan, diisi ibana ma aek asa mangolu ninna rohana. Dung i di tutup ibana ma jabuna i laho ma ibana tu haumana mangula. Dung botari mulak ma ibana sian balian, di bungka ibana ma pintu ni jabuna lao ma ibana naeng mambuat dengke ihan i alai tarsonggot ma ibana ai dang disi be dengke i. bah tudia do lao dengke i, ise naeng mambuat ninna rohana. Lao ma ibana tu dapur tarsonggot ma ibana hape jumping na ma disi sahalak na marbaju na uli na tongon mangalompa. Dibagasan songgot jala mabiar ibana disungkun ibana ma ise do ho. Dungi dialusi namarbaju i ma ibana, di patorang ma paboa ihan na balgai do ibana na gabe sahalak na marbaju. Jala didok dolidoli i ma asa saut nasida gabe berkeluarga. Mangoloi do antong namarbaju i, alai didok namarbaju i ma tu dolidoli i. Na olo do ahu songon pangidoan mi alai nauaeng marpadan ma hita, molo adong pomparanta na so jadi dohononmu, ihan au. Anggo i do syaratan gampang ma i. olo ninna dolidoli i ma tompu .

Di pardalanan ni keluarga nasida tubu ma sahalak ianakkonna, alai anggo ulaon ni amantai sai tong do mangula di hauma, sai burju jala di hapadothon amanta i do na mangula hauma i ala sian i do dalan ni ngolunasida.

Disada tingki dung marumur 10 taon dakdanak i, tongon mangula di hauma ma amanta i. Disuru inantai ma anaknai manaruhon indahan ni amanta i tu hauma. Ala antar holing do hauma i, tibu do nian disuru natorasna anakna i manaruhon bohal ni amana i, alai songon i ma huroha angka dakdanak lalap ma didalan gabe marmeami. Diparmeaman i male ma ibana , jala di pangan ibana ma sipanganon ni natorasna i. dung i sahat ma ibana tu hauma. Andorang so ro anakna i nungga sai busisaon amanta i, boasa dang marna di taruhon bohalna, nungga male ibana, alai dung ro anaknai songon na mombun ma rimasna. Alai dung di ida ibana bohal na i nungga bekas panggariangan, ai boasa songon on indahan on ninna amantai ma tu anaknai , dung i dipatorang anakna i ma. Ima da bapa nangkin lalap au marmeam, gabe male huhilala jala laos gabe hupangan indahan i. ala ni malena, jala ala ni rimas ni amanta i didok ibana ma di bagasn muruk na e.. tahe tanda do ho anak ni ihan. Umbege hata ni amana i tarsonggotmaanaknai, mangangguhi ma ibana mulak jala mangalualu ma ibana tu inang na na songon i pandohan ni amana i tu ibana, ai to ho do anak ni ihan au inong?. Ninna anakna i. disulingkit inantai ma ise mandok i, bapa ninna. Umbege i gabe sai tumatangis ma inantai, dungi ro ma amanta i sian hauma. Didok inantai ma tu anakna i manjangkit ma ho tu hauan, didok ma muse tu amantai, nungga di ose ho padanta, on pe ho do siose padan, tongon ro udan, ditimbungkon inantai ma tu batang aek pambuatan na hian, gabe dengke ma inantai, jala sailam mangalantap ma aek sian batang aek i. ima ninna barita, cerita parjadi ni tao toba.

 Naeng dohononna tu hita ima arga ni padan i, nang pe  idaon songon na mura do syarat na alai panghorhonna ima sahat tu sude panggulmiton ni ngoluta. Molo marpadan ho tu Debata ulahon ma i sian nasa roham, ai balga do upa ni si ulahon Padanna tu Debata alai sebalikna si ose padan na tagamon sai tarhirim do ngolu ni i. Amen.