Barita Mardongan Poda

Barita Mardongan Poda
Tuak
Tardok minuman khas do tuak di halak hita, didok partoba do molo ni inum tuak pintor sombu do uas, pintor mago do angka na loja i, pintor tabo do modom.
Didok sada barita sasintongna ninna ia barita ni tuak on ima hasil ni ramuan ni sahalak datu, parburu. Di sada tingki diagati ibana ma sada hau ni bagot jala aek na on dibaen ma disada hudon tano na balga. Dung i, laho ma ibana marburu alai dibagasan sadari i holan sada pidong sitapetape ( Burung nuri) ma didapot. Mulak ma ibana diseat ma pidong i jala didurushon ma mudarna tu hudon na balga i. Dungi laho ma ibana muse marburu, dapotna ma herek (kera). Mulak ma ibana diseat ma herek i jala disurushon ma mudarna tu hudon na balga i. Dung i muse lao ma ibana marburu, alai dapot ni sambil na ma sada babiat ( Harimau). Diboan ibana ma harimauon jala di seat ma huhut ma tong didurushon ibana muse mudarna i tu hudon i. Dung salpu i didok rohana, paradat do halak batak jala adong do pahanpahanan na, asa singkop ramuan on ditangkup ibana ma pinahanna (B2) diseat ma jala tong ma didurushon ibana mudarna tu hudon i. Nungga be singkop ramuan on, ninna rohana. Dibahen ibana ma tabastabasna jala diusehon ma ramuan na i tu bona ni hau bagot i.
Alani dideba halak sahat tu sadarion adong do mandok ia tuak obat do iima pasombu uas , paulak hosa loja. Didok ma muse denggan do tuak tu angka ina panarusan, ( Ibu yang baru melahirkan utk memperlancar ASI), molo di dosis na tertentu.
Alai di deba halak na minum tuak marpanghorhon do tabas tabas ni datu i sahat tu tingki on. Ai molo ni inum tua dosis 2-3 galas pintor songon pidong sitapetape do jolma i. Ai halak parhohom hian do ibana alai dung di inum tuak i gabe holan na marhata i ma ibana, ai berkicau ma songon pidong sitapetape i.
Jala dung masuk 4 - 5 galas , songon herek i ma pangalahona, marende i ma, marjoget i ma, jala olo ma naik tu atas ni meja, gabe mangangkati ma songon herek.
Masuk ma muse sahat tu 6 – 7 galas, songon babiat i ma ibana ( Harimau), pintor mangasangi ma, angar jago ma, ise na jago.. ice urroa ninna ma.
Masuk ma muse 8 – 10 galas, songon pinahan lobu i ma ibana (B2), ai opat ma pat, martugarang ma ibana, pataru au minum nga godang au mulak…! ninna ma.Manghatai pe dang diboto be, mardalan pe nungga martugarang, dang diboto be adat, molo sahat di jabu laos olo ma masuk tu kamar ni simatuana manang laos olo ma modom di bondar.
Barita mardongan poda do i hamu angka dongan, asa tarajai dirinta.
Didok Apostel Paulus di Efesus 5:18 "Unang ma mabuk hamu bahenon ni anggur, ai hamagoan do di bagasan i; alai gok Tondi ma hamu!