Jamita Minggu 2010

Epistel Pesta Natal II hon. Tgl. 26 Desember 2010
“ Ai Ho Do Jahowa, Debatangku”
Jeremia 31: 15-18


H
amu angka dongan sahaporseaon dibagasan goar ni Tuhanta Jesus Kristus, Selamat Natal ma di hita saluhutna…!.
Ia turpuk Jeremia bindu 31 on ima na marisihon hata panurirangon ni si Jeremia taringot tu bagabaga haluaon manang hamumulak ni bangso Israel sian habuangan Babel. Di tingki i harajaon ni Israel nungga tarbagi dua, ima Israel Utara dohot Israel Selatan ( Jehuda) alai na rap tartaban do nasida tu Babel. Alai nuaeng marhite hata panurirangon on, Debata sandiri ma nuaeng paimbaruhon pangkirimon ni Bangso Israel secara umum ( Jeremia 31:27-30) jala secara khusus Jehuda ( Jeremia 31: 27-30) ima marhite Debata mangalehon Padan na imbaru, padan na dumenggan namanghamham ngolu pardagingon dohot partondion ni bangso i. Debata mangalehon haimbaruon ni ngolu na naeng jumpang di bangso na tarbuang i tangkas do i didok di Jeremia 31: 3 ” Haholongan salelenglelengna hubahen mangkaholongi ho, dibahen i hutogutogu ho marhitehite asi ni roha”.

Dibagasan turpuk on tangkas do dipapatar haimbaruon ni parngoluon nanaeng sipamasaon ni Debata ala naung marpangulahi roha-Na jala ala naung ditangihon Debata anggukangguk ni bangso i tangkas do i tarida marhite pandohan ” Songon on do hata ni Jahowa”. Lapatanna paboa ndada rencana ni jolma i alai tung sangkap ni Debata sandiri do. Jala naeng dohononna holan marhite sian sangkap dohot lomo ni roha ni Debata sambing do asa boi jumpang ni jolma i haluaon, ai diluar ni Debata sai hasusaan do ngolunasida songon na nialaman ni bangso Israel na tarbuang i. Asa naeng do ganup jolma olo manangihon hata ni Jahowa, Roma 10:17 Asa sian na tumangihon do ro haporseaon; ia panangihon i, sian hata ni Kristus do.
Hamu angka dongan………………… Tardok tolu bagian ma turpuk on ima:
1. Tarbege do di Rama soara andung dohot partangisan (Ayat 15).
Rama ima sada kota na metmet, 8 Km dompak Utara Jerusalem. Huta Rama on ma na gabe inganan ni angka tawanan perang na di tahan andorang so diboan nasida tu Babel (Bnd. Jeremia 40: 1- 3,). Rama ima inganan ni panguhum si Debora (Panguhum 4:5), di Rama do tinggal si Samuel (1 Samuel 1:9; 7:17) ima efraim., di tingki ni si Daud hea do ibana marondingonding di huta Rama on ( 1 Samuel 19:18). Alai laos huta Rama on do na gabe rute pardalanan ni halak Asyur tu Jerusalem (Jesaya 10:29). Jala didok angka penafsir laos di Rama on do parbandaan ni si Rahel ( 1 Samuel 10: 2, 1 Musa 35:19) ima na marparbalohan tu huta ni Benjamin jala dilaonlaon ni ari didok ma huta on Efrata jala on do na tinudu ni panurirang Mika ( Mika 5:1) ima na gabe huta haroroan ni Sipalua i.
Di huta Rama on ma tarbege anggukangguk dohot partangison: Ditatangisi si Rahel anakkonna, ndang olo ibana apulon taringot tu anakkonna i, ai nunga siap nasida (Ayat 13). Rahel ima istri ni si Jakob, na manubuhon si Josep dohot si Benjamin. Rahel ima ina na manubuhon Israel. Sian i naeng idaonta ma paboa sitaonon ni sahalak ina na agoan anak na hinaholonganna na so olo apulan ala naung mago anak hinaholonganna, ima na patuduhon sitaonon ni bangso Israel na tarbuang i, na so adong be panghirimon dohot hiras ni roha alani sitaonon na masa tu ngolunasida di habuangan Babel. On ma gombaran ni bangso i secara umum ala nungga mandate jala ala ni borat ni sitaonon di habuangan i nasida.

2. Paontok soaram sian partatangison dohot matami sian iluilu, ai adong do upa ali ni hangalutonmu ( Ayat 16- 17)
Hata “ Paontok” dibahasa Indonesia didok “ Cegahlah”. Boi dohonon marhite sian i Debata sandiri manganju, mengelekelek, paposhon rohana asa sip, asa unang sai lalap tumatangis. Isarana songon sahalak ama rupani namangelek anakna na mangangguhi jala sialana ima ala ni hasalaan na sandiri do umbahen na gabe madabu manang gabe hansitan ibana na gabe sai tumatangis jala na so tarelek ni halak na asing be ibana alani i. Alai nuaeng ro ma amana mangelekelek ibana asa sip, asa unang be didatdati na tumatangis i. Tudos tu si ma nuaeng hadirion ni Debata mangelekelek bangso na hinaholongan-N

in reference to: Hotman aritonang (view on Google Sidewiki)